«الحضري»: «مليش خليفة ومفيش حد يقدر يجبرني إن أنا أعتزل» (فيديو)

قال عصام الحضري، حارس النادي الإسماعيلي، إنه لا يرى خليفة له في الملاعب المصرية، مؤكدًا أنه لن يوجد «عصام حضري ثاني»، كما شدد على عدم قدرة أي شخص أن يجبره على الاعتزال.

وأوضح صاحب الـ 45 عامًا، في حواره مع برنامج «اللعيب»، على قناة MBC مصر: «موضوع حراسة المرمى أو حارس المرمى أو اللاعب اللي موهوب أو مش موهوب، فيه فرق بين حاجتين فيه حارس مرمى موهوب وحارس مرمى بالتمرين، الموهوب محتاج حاجة بسيطة زي التلميعة عشان يبقى حارس مرمى يوصل للي هو عايزه، بس هو جواه عايز إيه؟ عايز ولا مش عايز؟ وفيه حارس مرمى اللي هو بالتمرين وبالشغل وبالحاجات يقدر يوصل للي هو يوصله، أهم حاجة في الأول والأخير القرار أنت عايز إيه».

وأضاف: «أنا كحضري، هتقولي فيه عصام الحضري أو فيه أحسن من الحضري، أنا طول عمري بقولها، دي ملهاش إجابة دبلوماسية، مفيش عصام حضري، ومفيش أبوتريكة ومفيش محمد صلاح، مفيش خليفة، بس ممكن يكون فيه أحسن من عصام الحضري، مين بقى اللي أحسن من عصام الحضري؟».

وانتقل «الحضري» للحديث عن الاعتزال ليقول: «موضوع اعتزالي أو موضوع أنا لما لعبت وقلت اعتزلت دولي ده كان الوقت المناسب. موضوع الكرة، أنا قبل كدة قلت، طول ما أنا قادر أدي مفيش حد يقدر يجبرني إن أنا أعتزل، لأن أن بشتغل المهنة دي بعتبرها مهنة، ربنا أعطاني ووفرلي حاجات كثيرة، لازم أصونها لآخر يوم، هفضل اشتغل لغاية ما هاجي أقول ساعة ما أحس إن أنا مانيش قادر أدي هرفع الراية وأقول يا جماعة أنا كذا كذا كدة ستوب خلاص».

واستطرد: «بس حتة الاعتزال أنا فيه ناس ممكن بتقابلني أو لعيبة أو حراس بيقابلوني وموجودين دلوقتي على الساحة، أو احنا غيرنا الفكر بتاع لاعب كرة القدم اللي كان لما يوصل لـ 32 أو 34 بطل، النهاردة فيه لعيبة بتلعب 41 سنة موجودين في الدوري، حراس مرمى موجودين».

وأكد الفائز بأمم إفريقيا 4 مرات مع الفراعنة أن «عدم الملل» هو «نعمة من عند ربنا، كرة القدم هي زي حاجة أنت بتصونها زي ما بتصون عيلتك أو أهلك أو ولدتك واخواتك، دي حاجة عندك عاملة زي إن ربنا عاطيني النعمة دي لازم اصونها، بصونها لآخر يوم، ممكن واحد يقولك هو مبيزهقش؟ في حالات في وقت بييجي، بس صراحة بيجيلي وقت كدة بحس إن أنا برضه جعان، يعني أنا ممكن دلوقتي أسيبك وتلاقي بعد شوية رايح اتمرن في الجيم».

وردًا على سؤال عن موعد اعتزاله رد: «معرفش والله»، فيما علق على إمكانية عودته للعب الدولي قائلًا: «المنتخب بيوحش أي واحد، منتخب مصر واحشني، لكن ده الوقت المناسب اللي أنا أخدته بعد كأس عالم ببطل، هيجي يوم وهتبعد عن المنتخب، بعد كأس أمم؟ الله أعلم هتاخد كأس أمم ولا مش هتاخد».

-الإعلانات-